من الاشياء الايجابية الي شفتها خلال الازمة الي تعيشها البلاد حاليا هي عمليات ومحاولات التصنيع لبعض التجهيزات الطبية الغير متوفرة في السوق التونسية والي اصبح استيرادها صعب بسبب التهافت الدولي لاقتنائها…..
شفنا عمليات ناجحة لتصنيع اقنعة طبية والاقنعة هاذي عمرها ما تصنعت سابقا في تونس..شفنا عملية تصنيع ناجحة لسرير طبي خاص بعزل مرضى الكورونا شفنا نماذج تصنيع ناجحة لبعض المعدات التنفسية..شفنا عمليات تصنيع للكمامات الطبية مع العلم انو الكمامات الطبية تونس كان ديما تستوردها بالعملة الصعبة …
شفنا استعمال الداخلية لجهاز ” روبوت” مصنع في تونس…..محاولات التصنيع هاذي لازم نبنو عليها ولازم يتم الاستثمار فيها…
مدام عندنا طلبة وشباب قادرين يصنعو اقنعة طبية واجهزة تنفس علاش منولوش في تونس نستغلوا هذا مستقبلا ونولو نصنعوا بكميات كبيرة للسوق الداخلية ونصدروا ..علاش منولوش في تونس نصنعوا الكمامات الطبية ونقفو توريدها بالعملة الصعبة…علاش منطوروش تصنيع الاسرة الطبية ونولوا نصنعوا بالالاف مدام نجحنا في تصنيع نماذج…..علاش ما نستثمروش في الروبت الي صنعوه شباب تواسة وسلموه للداخلية وفي المستقبل نولو نصنعوا روبتات متطورة اكثر وفي استعمالات متععدة….محاولات التصنيع التلقائية الي صارت في تونس المدة الاخيرة تبين الي الادمغة موجودة وروح المبادرة موجودة ينقصنا فقط ارادة من الدولة لدعم التصنيع وينقصنا ايضا ارادة من القطاع الخاص والقطاع البنكي في تمويل ودعم والاستثمار في المجال هذا.
فراش عازل بصنع و فكر تونسي 🇹🇳100% من شركة Consomed التونسية.
الفراش هذا يكون المصاب بالكورونا في وسطو معزول كليا عن من سيباشرونه من إطار طبي و شبه طبي من غير ما يمثل عليهم خطر عدوى و ينجمو يتعاملو معاه بكل أريحية.
حتى اليدين ثمة يدين في الفرش من الداخل على شكل des gants يدخلو فيهم الطبة يديهم من البرا.
حاجة تعمل 66 كيف و حاجة ترجعك في الطرح..
شكرا لجنود الخفى الحقيقيين الساهرين على مصلحة البلاد و العباد.
كل الشكر و التقدير..